1 iyun Uşaqların Beynəlxalq Müdafiəsi Günü münasibətilə Gənclər üçün Təhsil Mərkəzi maraqlı tədbirlər proqramı həyata keçirib.

Lent.az-ın məlumatına görə, Mərkəz bu gün regionlarda uşaq hüquqlarının təbliği məqsədilə həvəskar gənclərin iştirakı ilə maarifləndirici tamaşalar keçirib.

Füzuli və Beyləqan rayonlarında səhnəyə qoyulmuş tamaşalarda yüzlərlə məktəbli və yeniyetmə iştirak edib, onlar uşaq hüquqları və onun qorunması mexanizmi barədə praktiki məlumatlar əldə edə biliblər.

Mərkəzin mədəniyyət bölümündə çalışan yaradıcı gənclərin hazırladığı tamaşalarda uşaq hüquqlarının əksər hallarda necə pozulduğu, onların necə və kim tərəfindən qorunduğu, qanun pozuntuları olduğu halda nə edilməli və s. suallara cavab tapmaq mümkün idi.

Mərkəzin mətbuat xidməti bu tip fəaliyyətlərin sentyabr ayından etibarən digər regionlarda da davam etdiriləcəyi barədə məlumat verib.

Qeyd edək ki, 1 iyun Uşaqların Beynəlxalq Müdafiəsi Günü 1949-cu ildə Beynəlxalq Demokratik Qadınlar Federasiyası tərəfindən təsis edilib.

http://www.lent.az/news.php?id=31382