Bu gün Gənclər üçün Təhsil Mərkəzinin dəstəyi ilə Anadolu Türk Litseyinin akt zalında Türkiyə Cümhuriyyətinin ən böyük qeyri-hökumət gənclər təşkilatı olan Toplum Könüllüləri Vakfının Azərbaycan nümayəndəliyinin ilk təqdimatı keçirildi.
Türk və azərbaycanlı tələbələrin, QHT və KİV nümayəndələrinin, eləcə də təhsil işçilərinin qatıldığı təqdimatın keçirilməsində əsas məqsəd Vakfın fəaliyyəti haqqında ictimaiyyəti məlumatlandırmaq və gələcək inkişaf strategiyalarını iştirakçılarla bölüşmək olmuşdur.
Könüllülüyün inkişafını təşviq etmək və könüllü fəaliyyətlərlə vətəndaş cəmiyyətinin gücləndirilməsinə kömək etmək olan nümayəndəliyin işinə maddi və texniki dəstək göstərən Gənclər üçün Təhsil Mərkəzinin rəhbərliyi adından direktor müavini Günay Sadıxova tədbirdə çıxış etmiş və bu gün Türkiyə və Azərbaycan gənclərinin birgə fəaliyyət göstərəcəyi ortaq bir qurumun olmasına ehtiyac olduğunu bildirmişdir. O, qeyd etmişdir ki, ölkələrimiz arasında iş adamlarının, siyasətçilərin və s. müştərək fəaliyyətləri mövcuddur və biz bunun şahidiyik. Lakin gənclərimiz və tələbələrimizin birgə hər hansı bir əməkdaşlığı yoxdur. Ona görə də biz yaranmış imkanlardan səmərəli istifadə etməliyik.
Daha sonra tədbir Vakfın baş ofisindən qonaq dəvət edilmiş 3 nəfər ekspertin təqdimatları ilə davam etmişdir.
Qeyd edək ki, tədbir 3 gün davam edəcək və təlim almış gənclərə sonda nümayəndəliyin üzvü statusu veriləcək.