Məlumat üçün bildirmək istəyirik ki, Azərbaycanda xeyli sayda onlayn qruplar fəaliyyət göstərir. Hər bir qrup yaranarkən qarşısına konkret məqsədlər qoyur və özləri üçün spesifik mövzular müəyyən edirlər. Əsasən qeyri-hökumət təşkilatları tərəfindən yaradılan bu qrupların əksəriyyəti müzakirə və yenilik xarakteri daşıyır. Lakin bu qrupların fəaliyyəti uzun müddət davam edə bilmir və yenilənmədiyi üçün fəaliyyətini dayandırır.
Gənclər üçün Təhsil Mərkəzinin yaratdığı və onun adı ilə birbaşa bağlı olan qrup isə Azərbaycanda ən böyük və davamlılığını qoruyan, onlayn məlumat və informasiya qrupudur. Hazırda qrupun 1500 üzvü var.
Qrupun yaranmasının əsas məqsədi Mərkəzin fəaliyyəti və yenilikləri haqqında məlumatların əldə edilməsinə şərait yaratmaqdır. Qrupa qoşulan insanlar bu informasiyalarla yanaşı, digər yerli və xarici təlimlər, seminarlar və konfranslar haqqında, iş elanları, qrant və təhsil təqaüdlər, təhsil yenilikləri və s. haqqında da məlumatlar əldə edə bilirlər.
Mərkəzin informasiya bölməsindən verilən məlumata əsasən Mərkəzin yaratdığı bu qrup gənclərin vaxt itkisinə yol vermədən yeniliklər və zəruri məlumatlar əldə etməsinə xeyli kömək edir. İnternetə çıxışı olan region gəncləri də bu qrupa böyük maraqla qoşula bilirlər.