Bu gün Gənclər üçün Təhsil Mərkəzində Bakı Dövlət Universitetinin 90 illik yubileyinə həsr olunmuş seminar keçirilmişdir.
“Gəncləri inkişafında BDU-nun rolu” adlanan seminarın keçirilməsində əsas məqsəd Azərbaycan gəncliyinin formalaşmasında xüsusi rolu olan Bakı Dövlət Universiteti haqqında əcnəbi gənclərin dolğun məlumatlar almasına kömək etmək idi.

Gənclər üçün Təhsil Mərkəzi ötən aydan etibarən Açıq Cəmiyyət İnstitutu Yardım Fondunun maliyyə dəstəyi ilə reallaşdırdığı “Gənclər üçün İKT Məktəbi” layihəsi çərçivəsində bir sıra fəaliyyətlərin əhatə dairəsini genişləndirmişdir. Belə ki, Bakı şəhərində yerləşən internat məktəblərində aparılan maarifçilik işlərinin həm də şəhərdaxili və şəhərətrafı qəsəbələrdə məskunlaşan qaçqın və məcburi köçkün məntəqələrində də davam etdirilməsinə başlanılmışdır.
Əsas məqsədi Azərbaycanda qaçqın və məcburi köçkün, eləcə də internat məktəblərindəki gənclərin informasiya-kommunikasiya texnologiyaları (İKT) sahəsində biliklərinin artırılması və zənginləşdirilməsi olan layihə çərçivəsində hədəf ərazilərdəki gənclər üçün internet resurslarından səmərəli istifadəyə həsr olunmuş praktik təlimlər keçirilir.

Məlumat verildiyi kimi bir neçə gün əvvəl Gənclər üçün Təhsil Mərkəzi “Region gənclərinin inkişafına dəstək” proqramının icrasına start vermişdir.
Əsas məqsədi region gənclərinin vətəndaş cəmiyyətinin inkişafı prosesində aktiv rolunu təşviq etmək, onların sosial ehtiyaclarını öyrənmək və həllinə çalışmaq olan proqramın 2 il müddətinə icra edilməsi planlaşdırılıb.
Bu məqsədlə dünən və bu gün Mərkəz Füzuli və Beyləqan gəncləri ilə görüş keçirmişdir. Görüşün keçirilməsində əsas məqsəd gənclərin mövcud problemlərini və ehtiyaclarını öyrənmək, onları yaradan səbəbləri aşkar etmək və qiymətləndirmək idi. Hər bir regionda 40 nəfər gəncin iştirakı ilə keçirilən görüşlər zamanı Gənclər üçün Təhsil Mərkəzinin həmin regionlarda yeni ofislərinin yaradılması və fəaliyyətinə dair məsələlər də müzakirə edilmişdir.

Gənclər üçün Təhsil Mərkəzi bu ilin aprel ayından başlayaraq Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Texniki-peşə təhsilinin inkişafına dəstək” layihəsini icra etməyə başlamışdır. Layihə ölkə iqtisadiyyatının inkişaf tələblərinə uyğun peşə ixtisas kadrlarına yaranan tələbatının ödənilməsi, habelə əhalinin müasir peşə təhsili almaq imkanlarının təmin edilməsi üçün iqtisadi və sosial baxımdan səmərəli texniki peşə təhsili sisteminin formalaşdırılmasına xidmət etməyi və gənclərdə peşə təhsilinə həvəs oyatmağı nəzərdə tutur.

Ötən gün Gənclər üçün Təhsil Mərkəzinin “QHT Məktəbi” payız təlimləri silsiləsinə start verildi.
2002-ci ildən Gənclər üçün Təhsil Mərkəzi tərəfindən həyata keçirilən “QHT Məktəbi” təlimlərinin əsas məqsədi QHT nümayəndələrinin, eləcə də QHT sektoru ilə maraqlanan şəxslərin bilik və təcrübəsinin artırılmasına kömək etməkdir.
Bu günədək 700-dən çox insanın iştirak etdiyi “QHT Məktəbi” təlimlərində iştirak etmək niyyətində olanlar xüsusi müraciətlər əsasında seçilir və təlimlərə qatılırlar.
Qeyd edək ki, təcrübəli təlimçilər tərəfindən keçirilən “QHT Məktəbi”nin payız təlimləri 2 ay davam edəcək.

Bu gün Gənclər üçün Təhsil Mərkəzində Avropa Birliyinə üzv 15 ölkənin o cümlədən, Fransa, Portuqaliya, Avstriya, Belçika, Polşa və Türkiyənin “Gənclər Fəaliyyətdə” proqramı üzrə Milli agentliklərinin rəsmi nümayəndələri, eyni zamanda, Avropanın ən fəal gənclər təşkilatlarının nümayəndələri ilə görüş keçirilmişdir.
Əsas məqsədi Mərkəzin fəaliyyəti ilə tanış olmaq, eləcə də Mərkəzlə Avropa Birliyinə üzv ölkələrin gənclər təşkilatları ilə əməkdaşlıq olan tanışlıq görüşü Avropa Şurası, Gənclər və İdman Nazirliyi və “Salto Youth Resurs Mərkəzi” nin təşkilatçılığı ilə baş tutmuşdur.

Gənclər üçün Təhsil Mərkəzi Avropa Şurasının Gənclər Fondunun maliyyə dəstəyi ilə icra etdiyi “Fərqli olsaq da birlikdəyik” layihəsinin ikinci mərhələsini icra etməyə başladı.
Əsas məqsədi milli azlıqlardan olan gənclərin vətəndaş cəmiyyətinin inkişafı prosesində rolunu artırmaq və aktiv vətəndaşlıq dəyərlərinin aşılanması olan layihənin birinci mərhələsində Azərbaycanın müxtəlif regionlarından olan 25 nəfər milli azlıqlardan olan gəncə xüsusi təlimlər keçirilmişdir. Onlar təlimlər zamanı QHT idarəçiliyi, layihələrin yazılması və idarə edilməsi, liderlik qabiliyyətlərinin formalaşdırılması və s. mövzularda biliklərə yiyələnmişdirlər.

Gənclər üçün Təhsil Mərkəzi bu gündən etibarən “Region gənclərinin inkişafına dəstək” proqramının icrasına start verdi.
Əsas məqsədi region gənclərinin vətəndaş cəmiyyətinin inkişafı prosesində aktiv rolunu təşviq etmək, onların sosial ehtiyaclarını öyrənmək və həllinə çalışmaq olan proqramın 2 il müddətinə icra edilməsi planlaşdırılıb.
Proqram 2 mərhələ olmaqla, Azərbaycanın 24 rayonunu əhatə edəcək. Proqramın birinci mərhələsində 24 rayonun hər birində gənclər qrupları arasında görüşlər və qiymətləndirmə sorğuları keçiriləcək, onların ehtiyac və təklifləri öyrəniləcəkdir. İkinci mərhələdə isə öyrənilmiş ehtiyaclara əsasən layihə və tədbirlər həyata keçiriləcək.

Bu gün Gənclər üçün Təhsil Mərkəzi tərəfindən gənclərin xaricdə təhsil almaq imkanlarının artırılmasına həsr olunmuş seminar öz işinə başlamışdır.
Seminarı giriş sözü ilə açan Mərkəzin təsisçisi Vüsal Quliyev tədbirin əsas məqsədi barədə məlumat vermişdir. Qeyd etmişdir ki, seminar gənclərin xaricdə təhsil almaq imkanlarının genişləndirməsini və bu imkanların əldə edilməsi üçün hansı addımların atılmasını onlara çatdırmaqdan ibarətdir.

Gənclər üçün Təhsil Mərkəzi “Gənclər üçün İKT Məktəbi” layihəsinin icrasına başladı. Açıq Cəmiyyət İnstitutu Yardım Fondunun maliyyə dəstəyi ilə icra edilən layihənin əsas məqsədi Azərbaycanda qaçqın və məcburi köçkün, eləcə də internat məktəblərindəki gənclərin informasiya-kommunikasiya texnologiyaları (İKT) sahəsində biliklərinin artırılması və zənginləşdirilməsidir.
Gənclərdə İKT-yə maraq oyatmaq, İKT imkanlarından istifadə etməklə müxtəlif sahələrdə maarifləndirilmələrinə və əldə edilmiş biliklər vasitəsilə cəmiyyətin inkişafında aktiv rol oynamalarına şərait yaratmaq, onların aktiv İKT istifadəçisinə çevrilməsinə çalışmaq və s. vəzifələri öz üzərinə götürən layihənin 2000-dən artıq gənci əhatə etməsi planlaşdırılıb.
Layihə 2010-cu ilin mart ayınadək davam edəcək.